നൂറുദിന കർമ പരിപാടിയുടെ ഭാഗമായി 46 സ്‌കൂൾ കെട്ടിടങ്ങളുടെ ഉദ്ഘാടനവും 79
കെട്ടിടങ്ങളുടെ ശിലാസ്ഥാപനവും നവംബർ നാലിന് വൈകിട്ട് മൂന്ന്
മണിയ്ക്ക് മുഖ്യമന്ത്രി പിണറായി വിജയൻ നിർവ്വഹിക്കും. പൊതുവിദ്യാഭ്യാസ
മന്ത്രി പ്രൊഫ. സി. രവീന്ദ്രനാഥ് അദ്ധ്യക്ഷത വഹിക്കും. ധനകാര്യ മന്ത്രി
ഡോ.ടി.എം. തോമസ് ഐസക്ക് മുഖ്യ പ്രഭാഷണം നടത്തും. മന്ത്രിമാരായ ഇ.പി.ജയരാജൻ,
എ.കെ.ബാലൻ, എ.സി.മൊയ്തീൻ, പി.തിലോത്തമൻ, ജെ.മേഴ്‌സിക്കുട്ടിയമ്മ, കെ.രാജു,
വി.എസ്. സുനിൽകുമാർ, കെ.കൃഷ്ണൻകുട്ടി, രാമചന്ദ്രൻ കടന്നപ്പള്ളി എന്നിവർ
മുഖ്യാതിഥികളായിരിക്കും.
46 വിദ്യാലയങ്ങളിൽ അഞ്ച് കോടി കിഫ്ബി ധനസഹായത്തോടെയുളള ആറ് വിദ്യാലയങ്ങളും
മൂന്ന് കോടി കിഫ്ബി ധനസഹായത്തോടെയുളള ആറ് സ്‌കൂളുകളും, നബാർഡ്, പ്ലാൻ
ഫണ്ട്, സമഗ്രശിക്ഷ കേരളം, ജനപ്രതിനിധികളുടെ ആസ്തി വികസന ഫണ്ട് എന്നിവ
ഉപയോഗിച്ച് നിർമ്മിച്ച 34 വിദ്യാലയങ്ങളുമുണ്ട്. ഇതിൽ പൈതൃക സംരക്ഷണ
പദ്ധതിയിൽപ്പെടുത്തി പുനർനിർമ്മാണം നടത്തിയ അട്ടക്കുളങ്ങര ഗവ. സെൻട്രൽ
ഹൈസ്‌കൂളും ഉൾപ്പെടുന്നു. ശിലാസ്ഥാപനം നടത്തുന്ന 79 വിദ്യാലയങ്ങളിൽ കിഫ്ബി
ധനസഹായത്തോടെ കില എസ്.പി.വിയായ 41 വിദ്യാലയങ്ങൾ, മറ്റു എസ്.പി.വികൾ
നിർമ്മാണച്ചുമതലയുളള അഞ്ച് വിദ്യാലയങ്ങൾ, നബാർഡ്, പ്ലാൻ ഫണ്ട്, സമഗ്രശിക്ഷാ
ഫണ്ട് എന്നിവ പ്രയോജനപ്പെടുത്തി 33 വിദ്യാലയങ്ങൾ ഉൾപ്പെടുന്നു.
തിരുവനന്തപുരം-ആറ്, കൊല്ലം-എട്ട്, ആലപ്പുഴ-മൂന്ന്, പത്തനംതിട്ട-രണ്ട്,
കോട്ടയം-രണ്ട്, ഇടുക്കി-ഒന്ന്, എറണാകുളം-രണ്ട്, തൃശ്ശൂർ-ഒൻമ്പത്,
പാലക്കാട്-ഒന്ന്, മലപ്പുറം-അഞ്ച്, കോഴിക്കോട്-ഒന്ന്, വയനാട്-നാല്,
കണ്ണൂർ-രണ്ട് എന്നിങ്ങനെയാണ് സ്‌കൂൾ കെട്ടിടങ്ങൾ ഉദ്ഘാടനം ചെയ്യുന്നത്.
തിരുവനന്തപുരം-12, കൊല്ലം-11, ആലപ്പുഴ- എട്ട്, പത്തനംതിട്ട-രണ്ട്,
ഇടുക്കി-മൂന്ന്, പാലക്കാട്-30, മലപ്പുറം-മൂന്ന്, കോഴിക്കോട്-മൂന്ന്,
കണ്ണൂർ-ആറ്, കാസർകോട്-ഒന്ന് എന്നിങ്ങനെയാണ് ശിലാസ്ഥാപനം നടത്തുന്ന
സ്‌കൂളുകളുടെ ജില്ല തിരിച്ചുളള കണക്ക്.