വേനല്‍ക്കാലത്ത്
വൈദ്യുതി ഉപഭോഗം പരമാവധി കുറയ്ക്കുക എന്ന ലക്ഷ്യത്തോടെയുള്ള സംസ്ഥാന
വൈദ്യുതി ബോര്‍ഡിന്റെ ലാഭപ്രഭ-2 എന്ന പ്രചരണ പരിപാടിക്കായി സ്‌കൂള്‍
തലത്തില്‍ നടപ്പിലാക്കേണ്ട നിര്‍ദ്ദേശങ്ങള്‍ നല്‍കി സര്‍ക്കുലര്‍
പുറപ്പെടുവിച്ചു.
ഇതനുസരിച്ച് വിദ്യാര്‍ത്ഥികള്‍ക്കിടയില്‍ ലാഭപ്രഭ പദ്ധതിയെ
പരിചയപ്പെടുത്താന്‍ ഒരു അദ്ധ്യാപക കോ-ഓര്‍ഡിനേറ്ററുടെ സന്നദ്ധസേവനം
ഉറപ്പാക്കണം. സ്‌കൂളിലെ എല്ലാ വിദ്യാര്‍ത്ഥികളേയും പദ്ധതിയില്‍
ചേര്‍ക്കുകയും കോ-ഓര്‍ഡിനേറ്റര്‍മാര്‍ക്ക് നിര്‍ദ്ദേശം നല്‍കുക. എല്ലാ
വിദ്യാര്‍ത്ഥികളും അവരുടെ രക്ഷിതാക്കളെ എസ്.എം.എസ്. അയപ്പിച്ച് പദ്ധതിയില്‍
രജിസ്റ്റര്‍ ചെയ്യിക്കണം. അവധിക്കാലത്ത് സ്വന്തം വീട്ടിലെ വൈദ്യുതി
ഉപഭോഗം പരമാവധി കുറക്കാന്‍ വിദ്യാര്‍ത്ഥികളെ പ്രേരിപ്പിക്കുകയും ഇപ്പോള്‍
ഏറ്റവും ഒടുവില്‍ ലഭിച്ച വൈദ്യുതി ബില്ലിന്റെ കോപ്പി കോ-ഓര്‍ഡിനേറ്റര്‍
ശേഖരിക്കുകയും വേണം. രജിസ്റ്റര്‍ ചെയ്തവരുടെ ബില്‍, മൊബൈല്‍ വിവരങ്ങള്‍
എന്നിവ ക്രോഡീകരിക്കാനും ഊര്‍ജ്ജസംരക്ഷണം സംബന്ധിച്ച് മാധ്യമങ്ങളില്‍
വരുന്ന സന്ദേശങ്ങള്‍ സശ്രദ്ധം വീക്ഷിക്കാനും നിര്‍ദ്ദേശങ്ങള്‍ പാലിക്കാനും
വിദ്യാര്‍ത്ഥികളെ പ്രേരിപ്പിക്കുകയും വേണം.
സംസ്ഥാനത്തെ എല്ലാ സ്‌കൂള്‍ വിദ്യാര്‍ത്ഥികളെയും മഹത്തായ ഈ പദ്ധതിയില്‍
പങ്കെടുപ്പിച്ച് അവരില്‍ ഊര്‍ജ്ജസംരക്ഷണശീലം ഒരു ദിനചര്യയാക്കി
വളര്‍ത്തിയെടുക്കുന്നതിന് ഊര്‍ജ്ജസംരക്ഷണ പരിപാടിയായ ലാഭപ്രഭയുമായി
സഹകരിക്കാന്‍ സ്‌കൂള്‍ അധികാരികള്‍ ആവശ്യമായ നടപടികള്‍
സ്വീകരിക്കേണ്ടതാണെന്നും സര്‍ക്കുലറില്‍ നിര്‍ദ്ദേശിച്ചിട്ടുണ്ട്.