സ്കൂള്‍
കുട്ടികളുടെ ആധാര്‍ രജിസ്ട്രേഷനായി ഏര്‍പ്പെടുത്തിയ പ്രത്യേക സൌകര്യം 7137
കുട്ടികള്‍ പ്രയോജനപ്പെടുത്തിയതായി പൊതുവിദ്യാഭ്യാസ ഡയറക്ടര്‍ അറിയിച്ചു.
ഏപ്രില്‍ ഏഴിന് 222 കേന്ദ്രങ്ങളിലായി 286 ആധാര്‍ എന്‍റോള്‍മെന്റ്
മെഷീനുകള്‍ ഇതിനായി ഏര്‍പ്പെടുത്തിയിരുന്നു. ചില എ.ഇ.ഓഫീസുകളില്‍
സ്ഥലസൌകര്യം കുറവായതുകാരണം സ്കൂളുകളിലും മറ്റുകേന്ദ്രങ്ങളിലുമായാണ്
സ്കൂള്‍കുട്ടികള്‍ക്കായുള്ള പ്രത്യേക സൌകര്യങ്ങള്‍
ഏര്‍പ്പെടുത്തിയിട്ടുള്ളത്.
ഈ ക്രമീകരണം ഏര്‍പ്പെടുത്തിയിട്ടില്ലെന്ന് ആക്ഷേപമുണ്ടായ എ.ഇ.ഒ.മാരോട്
മൂന്നു ദിവസത്തിനുള്ളില്‍ വിശദീകരണം നല്‍കുന്നതിന് ആവശ്യപ്പെട്ടിട്ടുണ്ട്.
കുട്ടികളുടെ ആധാര്‍ എന്‍റോള്‍മെന്റിനായി ഏര്‍പ്പെടുത്തിയിട്ടുള്ള പ്രത്യേക
സൌകര്യം ഏപ്രില്‍ 13 വരെ തുടരും. ഈ സൌകര്യം ഏര്‍പ്പെടുത്തിയിട്ടുള്ള
വിശദവിവരം ലഭ്യമാക്കാനും എ.ഇ.ഒ.മാരോട് നിര്‍ദ്ദേശിച്ചിട്ടുണ്ട്.
എന്‍.പി.ആര്‍./യു.ഐ.ഡി. രജിസ്ട്രേഷനായി മുമ്പ് എന്‍റോള്‍ ചെയ്തവരും ഇനിയും
കാര്‍ഡ് ലഭിക്കാത്തവരുമായ കുട്ടികള്‍ രജിസ്ട്രേഷന് വീണ്ടും
ഹാജരാകേണ്ടതില്ലെന്നും ഡയറക്ടര്‍ അറിയിച്ചു.