അകത്തേത്തറ എന്‍ എസ് എസ് ഹൈസ്കൂള്‍ അധ്യാപികയായ ശ്രീമതി എല്‍ ആര്‍ ഹേമ എഴുതിയ ഒരു കവിത വായനാവാരത്തിന്റെ സമാപനദിവസമായ ഇന്ന് നിങ്ങളുടെ മുന്നില്‍ അവതരിപ്പിക്കുന്നു
പ്രണയം
പണ്ട്,കണ്‍മുനകളിലായിരുന്നു പ്രണയം
പടമെടുക്കലിലായിരുന്നു
അമ്പലമുറ്റത്തെദീപങ്ങളുടെ
തിളക്കത്തിലായിരുന്നു
പള്ളിയങ്കണങ്ങളുടെ ഒതുക്കുകല്ലുകളില്‍
പതുങ്ങിയിരുന്ന്
കലാശാലകളുടെ ജനലകള്‍ക്ക്പിന്നില്‍
മറഞ്ഞിരുന്ന്
സത്യസന്ധമായിരുന്നു പ്രണയം
നഗ്നമായിരുന്നു
പേരാലുകളെപ്പോലെ
ആഴത്തില്‍ വേരോടിച്ചിരുന്നു
പ്രണയംമരിക്കുമ്പോള്‍
ഹൃദയംആര്‍ത്തലച്ചുകരഞ്ഞിരുന്നു
വിങ്ങിവിങ്ങിതളര്‍ന്നിരുന്നു
ഇന്ന്,
മൊത്തമായുംചില്ലറയായുംവില്‍ക്കാനുണ്ട് പ്രണയം
മൊബൈല്‍ഫോണുകളില്‍
ഇന്റര്‍നെറ്റ് കഫേകളില്‍
പ്രണയം ദിവസവുംപുത്തനുടുപ്പണിയുന്നു
പഴയവ ഊരി ദൂരെയെറിയുന്നു
കാല്‍ച്ചുവട്ടില്‍ മണ്ണേയില്ല
ചെടിച്ചട്ടിയിലെ പൂച്ചെടിയാണ്
ദിവസവും വെട്ടിവെക്കാം
പിന്നെയോ,
പ്രണയത്തിന്റെ ജഡം ഉറുമ്പരിക്കും മുമ്പേ
സംസ്കരിക്കപ്പെടുന്നു